आबासाहेब काकडे शैक्षणिक समूह हा महाराष्ट्रातील विशेषतः अहिल्यानगर जिल्ह्यात सामाजिक भान आणि मूल्याधिष्ठित शिक्षणासाठी ओळखला जाणारा अग्रगण्य समूह आहे. सन १९३३ पासून शिक्षण व समाज उन्नती च्या ध्येयाने कार्यरत असलेल्या या समूहात दि फ्रेंड्स ऑफ दि डिप्रेस्ड लीग, शेवगाव (१९५३), नव महाराष्ट्र शिक्षण मंडळ, शेवगाव (१९६९) आणि राष्ट्रीय शिक्षण मंडळ, अहमदनगर (१९५३) या संस्था कार्यरत असून समूहाच्या एकूण ५२ शैक्षणिक शाखा समाजसेवेत योगदान देत आहेत. छत्रपती शाहू महाराज, महात्मा फुले, डॉ. बाबासाहेब आंबेडकर आणि महात्मा गांधी यांच्या सामाजिक आंदोलनांच्या प्रेरणेवर उभा असलेला हा समूह शिक्षणाद्वारे वंचितांना मुख्य प्रवाहात आणण्याचे कार्य सातत्याने करीत आला आहे. प्रारंभी दहा विद्यार्थ्यांपासून सुरू झालेला प्रवास वसतिगृहे, शाळा, बालगृहे आणि सामाजिक उपक्रमांच्या माध्यमातून व्यापक झाला. स्वातंत्र्य सेनानी डॉ. भाई सथ्था आणि कर्मयोगी आबासाहेब काकडे यांच्या अथक परिश्रमातून या संस्थांनी गरीब, शेतकरी, कामगार, आणि समाजातील मागास घटकांच्या मुलांना शिक्षण, निवास आणि संस्काराची आधारभूत सुविधा उपलब्ध करून दिली आहे. गावोगावी शाळा व महाविद्यालये सुरू करणे, गरजू व होतकरू विद्यार्थ्यांसाठी वसतिगृहे चालवणे, विद्यार्थ्यांच्या सर्वांगीण विकासासाठी नाविन्यपूर्ण उपक्रम राबवणे ही या समूहाची वैशिष्ट्यपूर्ण परंपरा आहे. सन १९८८ पासून अॅड. डॉ. विद्याधर (शिवाजीराव) काकडे यांच्या नेतृत्वाखाली या समूहाने गुणात्मक आणि उपक्रमशील विकासाची नवी उंची गाठली आहे. “शिक्षणाद्वारे समाज परिवर्तन” हे ध्येय गाठण्यासाठी समर्पण भावनेतून हा समूह कार्य करीत आहे.